|
|
जाणीव
आपण रोज पहातो
तेवढा एकच सूर्य नाही
आपण गाणी रचतो
तो चंद्रही एकमेव नाही
आपल्याला माहिती आहेत
अशा अनेक ग्रहमाला आहेत
नि अनेक आकाशगंगा सुद्धा !
हे मला समजलं तेव्हा मी म्हटलं,
असतील - असू देत !
पण माथ्यावरचं
हे अथांग निळं आकाश
ते सुद्धा एकच एक नाही
हे कळलं तेव्हा मात्र
मी कासावीस झाले
कारण
आता माझ्या नगण्यतेला
काही सीमाच उरली नाही ! |
|
|
`आरसा' नंतरचा `आकाश' हा माझा दुसरा
कवितासंग्रह. कवितेबरोबरच्या प्रवासात या
वळणापर्यंत अनेक सुहृदांची उमेद वाढवणारी
सोबत मला मिळाली. वडीलधाऱ्यांचे कौतुक आणि
आशीर्वाद लाभले, आणि मान्यवरांचे
प्रोत्साहन देणारे मार्गदर्शन झाले. या
सर्वांच्या मन:पूर्वक जिव्हाळयाने मला
थांबू दिले नाही. मला चालण्याचे श्रेय
मिळाले ! आता चालत राहण्यावरची माझी
श्रद्धा वाढली आहे. मनाला उभारी आहे आणि
पावलांना दिलासा ! या पुढील प्रवासातही ही
न संपणारी शिदोरी माझ्या सोबत असेल या
विश्वासाबरोबरच या साऱ्यांविषयीचा कृतज्ञ
भाव मनात जागतो आहे. हे सारं जिवापाड जपत
तुमच्या साक्षीनं मी चालत राहीन. |
|
|